Monday, September 30, 2013

கடவுள் வாழ்க

 
நீதான்
நீ மட்டும்தான் பே ரழகு
பிறகே சொன்னார்கள்
நீங்கள் ரெட்டைப் பிறவியாமே!
இன்னோர் பேரழகா!
கடவுள் வாழ்க
ஓவியத்தின் நிறைவில் சொக்கி
இன்னொரு பிரதி எடுத்துக்கொண்ட
ஓவியன் போலோ அவன்!
நீயேதான் அவளும்
எனினும்
இன்னோர் உன்னையும்
காண ஆவல்...
ஏன்?
மரகதப்புறா
ஒன்று பார்த்தால் போதாதா?
பிழையாக எண்ணாதே
தாயின்
இருமுலைகளையும்
கேட்டு அழும் பிள்ளை நான்
நான் கண்டதேயில்லை
ஒரே காலத்தில்
இரண்டு வசந்தங்கள்
இரண்டு முழு நிலாக்கள்
ஒரே வானில்
கிழக்கில் பிறந்துகொண்டிருக்கும்
இரண்டு சூரியன்கள்

நான் காணவேண்டும்!

Wednesday, September 18, 2013

உள்ளே வந்துவிட்ட கொசு


உள்ளே வந்துவிட்ட கொசு

வாகாய் கையருகில்
நெடு நேரமாய் தியானித்திருந்த கொசுவை
அடிப்பதுபோல் கை ஓங்க பறந்துவிட்டது
கைக்கெட்டா இடம் சேர்ந்து
அவனைவிட உயரமாகிப்போனது
தன் இமை மயிர் அளவேயான கொசுவை
நசுக்கிவிட பற்கள் கடித்துக்கொண்டு
ரப்பர் பந்தை விட்டெறிந்தான்
12 முறை சென்றுவந்தும்
அவன் இலக்கைத் தாக்கும் தீரம் இளக்காரமாக
அமர்த்தலாய் உட்கார்ந்துகொண்டிருந்தது
ஒரேயொருமுறை அதனருகில் விழுந்த பந்தின்
நுனி தீண்டவியலாத சுவரும் கூரையும்
இணையும் கவைக்குள் குடியேறிவிட்டது
‘எல்லாக் கொசுக்களும் டெங்கு கொசுக்களல்ல
கொசு கடித்த எல்லாரும் டெங்குவில் சாவதுமில்லை’
இயேசுவே அவன் காதில் சமாதானம் உரைத்தும்
டெங்கு பயம் மண்டைக்குள் ர்ர்ரீங்கரித்தது.
இப்போதும் பயனிலாத பந்தையே விட்டெறிய
பட்டுத் திரும்பி எரியும் மின்விளக்கின் மேல் விழுந்தது
நல்லவேளை உடையவில்லை
இப்போது இயேசு ஏதும் சொல்லாமல் கைவிட்டதால்
தனக்குத்தானே சொல்லிக்கொண்டான்
‘இதை கொசுவாயிருந்தபோதே அடித்திருக்கலாம்’